ஸ்ரீரங்கம் ரங்கநாதசுவாமி திருக்கோவில்

இந்திய நாடு பெரும்பாலும் கோவில்களால் நிறைந்த நாடு என்று சிறப்பித்து கூறப்படுகிறது. இங்கு காணப்படும் கோவில்களில் பல அவற்றின் துடிப்பான வரலாறு மற்றும் கட்டிடக்கலைக்காக உலகளவில் புகழ் பெற்றவையாக திகழ்கிறது. இந்தியாவில் கட்டப்பட்டுள்ள நேர்த்தியான கோவில்களின் மிக அற்புதமான உதாரணங்களில் ஒன்றாக திகழ்வது ஸ்ரீரங்கம் ஸ்ரீ ரங்கநாதசுவாமி திருக்கோவில் (Thiruchirappalli Sri Ranganathaswamy Temple). திராவிட கட்டிடக்கலை பாணியில் கட்டப்பட்ட இந்த கோவில் அதன் பிரம்மாண்ட அளவு மற்றும் தனித்துவமான கட்டிடக்கலைக்கு பெயர் பெற்றது ஆகும். இங்கு நாம் புகழ்பெற்ற ஸ்ரீரங்கம் ரங்கநாதர் திருக்கோவிலின் சிறப்புகளை (Srirangam Ranganathar Temple Features) பற்றி காணலாம்.

திருச்சிக்கு அருகில் உள்ளது உலகப்புகழ் பெற்ற ஸ்ரீரங்கம் ஸ்ரீ அரங்கநாத சுவாமி திருக்கோவில். இந்த திருக்கோவில் காவிரி மற்றும் கொள்ளிடம் ஆகிய இரண்டு ஆறுகளுக்கு மத்தியில் தீவு போல அமையப்பெற்றுள்ளது. பல்வேறு வரலாற்றுச் சிறப்புகளை பெற்ற இந்த கோவிலில் எண்ணற்ற சிற்பங்கள் நிறைந்து காணப்படுகின்றன. எனவே ஸ்ரீரங்கம் ரங்கநாதசுவாமி கோவிலுக்குச் செல்வது வரலாற்று ஆர்வலர்கள் மற்றும் பக்தர்களுக்கு ஒரு அற்புதமான அனுபவமாக இருக்கும்.

இங்கு, அவர்கள் கிபி 3 ஆம் நூற்றாண்டுக்கு முந்தைய கோவிலின் வரலாற்றை பற்றிய ஒரு பார்வையை பெறலாம். 9 ஆம் நூற்றாண்டில் காவேரியின் கரையில் உள்ள தலைக்காடு பகுதியைச் சேர்ந்த கங்கர்களால் இந்த கோவில் கட்டப்பட்டதாக மாற்று கருத்துக்கள் தெரிவிக்கின்றன. ஆயினும்கூட, அடுத்த சில நூற்றாண்டுகளில் மதம் மற்றும் கலாச்சாரம் ஆகிய இரண்டிற்கும் கோவில் ஒரு முக்கிய மையமாக மாறியது குறிப்பிடத்தக்கது.

இரண்டு ஆறுகளுக்கு இடையில் அமைந்துள்ள ஒரு தீவில் கோவில் பிரம்மாண்டமாக அமைந்திருப்பதால் பல முறை படையெடுத்து வந்தாலும், அது வளர்ந்து வரும் பக்தி இயக்கத்தின் செல்வாக்கு மிக்க மையமாக இருந்தது. இன்று உலகின் மிகப்பெரிய இந்து கோவில் வளாகங்களில் ஒன்றாக ஸ்ரீரங்கம் கருதப்படுகிறது, இது 14 ஆம் நூற்றாண்டின் பிற்பகுதியில் மீண்டும் கட்டப்பட்டது. இது 16, 17 மற்றும் 21 ஆம் நூற்றாண்டுகளில் அதன் அசல் கட்டமைப்பில் சேர்க்கைகளைக் கண்டது.

இந்த கோவில் அதன் ஆரம்ப காலத்தில் இருந்த கலாச்சார பன்முகத்தன்மை மற்றும் பரிமாற்றத்திற்கு சாட்சியத்தை அளிக்கிறது. நவீன கால பார்வையாளர்கள் தமிழில் மட்டுமல்ல, சமஸ்கிருதம், தெலுங்கு, மராத்தி, ஒரியா மற்றும் கன்னடத்திலும் வரலாற்று கல்வெட்டுகளைக் கண்டறிந்துள்ளனர். இந்தக் கல்வெட்டுகளுக்குப் பயன்படுத்தப்பட்ட எழுத்துக்களில் தமிழ் மற்றும் கிரந்தமும் அடங்கும்.

உலகின் மிகப்பெரிய இந்து கோவில் (World famous Srirangam Ranganathar Temple):

மகாவிஷ்ணு ரங்கநாதர் என்ற பெயரில் பாம்பணை மீது பள்ளி கொண்ட கோலத்தில் காட்சிதரும் இடம் தான் ஸ்ரீரங்கம் கோவில். இதுவே உலகின் மிகப்பெரிய இந்து கோவில் என்று சிறப்பிக்கப்படுகிறது. இந்த கோவில் சுமார் 157 ஏக்கர் பரப்பளவில் பிரம்மாண்டமாக கட்டப்பட்டுள்ளது. இந்த கோவில் வளாகத்தில் எம்பதுக்கும் மேற்பட்ட சிறிய கோவில்கள் உள்ளன. இந்த கோவில் வளாகத்திற்குள் எண்ணற்ற வணிக வளாகங்கள், குடியிருப்பு கட்டிடங்களையும் காண முடியும். உண்மையில் இந்த கோவில் மிகப் பெரியது, அது ஒரு தனி நகரம் போன்று காட்சியளிப்பது சிறப்பம்சம் ஆகும்.

ஸ்ரீரங்கம் கோவில் கட்டிடக்கலை(Architecture of Srirangam Ranganathar Temple):

ஸ்ரீரங்கம் ரங்கநாதசுவாமி கோயில் அதன் மதம் மற்றும் கலாச்சார முக்கியத்துவத்தைத் தவிர, அதன் பிரசித்திபெற்ற கட்டிடக்கலை காரணமாகவும் பலரால் விரும்பப்படுகிறது. உலகின் மிகப்பெரிய இந்து கோவில் என்ற சிறப்பை பெறும் இந்த கோவில் மிகச்சிறந்த திராவிட கட்டிடக்கலை பாணியில் வடிவமைக்கப்பட்டுள்ளது சிறப்பம்சம் ஆகும்.

சுமார் 155 ஏக்கர் பரப்பளவில் மிக பிரம்மாண்டமாக அமையப்பெற்றுள்ளது இந்த ஸ்ரீரங்கம் திருக்கோவில். இந்த பிரம்மாண்ட கோவிலின் வளாகத்துக்குள் 81 சிறு கோவில்கள், 21 பிரம்மாண்டமான கோபுரங்கள் மற்றும் 39 பிரம்மாண்ட மண்டபங்கள் உள்ளன. இங்கு இந்து மத நூல்கள் மற்றும் புராணக்கதைகள் மற்றும் மத அறிஞர்களின் வாழ்க்கையின் காட்சிகளை சித்தரிக்கும் ஓவியங்கள் உள்ளன.

இந்த கோவில் வளாகத்தில் உள்ள ஒரு குறிப்பிடத்தக்க கட்டடக்கலை அம்சம் 1000 தூண்களை கொண்ட ஆயிரங்கால் மண்டபம் ஆகும். 13 மற்றும் 15 ஆம் நூற்றாண்டுகளுக்கு இடையில் கட்டப்பட்ட இந்த கோவில் கட்டமைப்பில் மிக நேர்த்தியாக வடிவமைக்கப்பட்டுள்ளது. கோவிலின் உள்ளே காணப்படும் சிற்பங்களும் மிக நேர்த்தியாக வடிவமைக்கப்பட்டுள்ளன.

7 பிரகாரங்களைக் கொண்ட ஒரே கோவில் (Srirangam-The only temple with seven pragarams):

ஸ்ரீ ரங்கநாதசுவாமி கோவிலில் மொத்தம் ஏழு பிரகாரங்கள் உள்ளன. இந்த ஏழு பிரகாரங்களும் நம் உடலில் உள்ள ஏழு சக்கரங்களைக் குறிப்பதாக கூறப்படுகிறது. அனைத்து பிரகாரங்களிலும் அமையப்பெற்றுள்ள கோபுரங்களை சேர்த்து மொத்தம் 21 கோபுரங்கள் இங்கு உள்ளது குறிப்பிடத்தக்கது. இது பார்வையாளர்களுக்கு ஒரு தனித்துவமான காட்சியை வழங்குகிறது. வெளிப்புற இரண்டு பிரகாரங்கள் உள்ள இடம் கோவில் தொடர்பான பொருட்களை விற்கும் பல கடைகள் மற்றும் வீடுகள் நிரம்பி காணப்படுகிறது.

திருக்கோவில் முக்கிய சன்னதிகள் (Srirangam Ranganathar Temple Deities):

ஸ்ரீரங்கம் கோவிலுக்கு வருபவர்கள் உள்ளே உள்ள கருவறையில் சயனித்திருக்கும் ரங்கநாதரை முன் மண்டபம் வரை சென்று வழிபடலாம். அவர் ஐந்து கவசங்களுடன் சுருண்ட பாம்பான ஆதிசேஷனின் மீது சாய்ந்த நிலையில் சயனித்திருக்கிறார். இந்த ரங்கநாதர் திருமேனிக்கு உள்ள ஒரு தனிச்சிறப்பு என்னவென்றால், அது கஸ்தூரி, கற்பூரம், தேன், வெல்லம் மற்றும் சந்தனத்தால் செய்யப்பட்ட கலவை ஆகும். மூலவர் ரங்கநாதருக்கு முன்னர் காட்சிதரும் உற்சவர் நம்பெருமாள் மற்றும் அழகிய மணவாள பெருமாள் என்று சிறப்பித்து அழைக்கப்படுகிறார். இவரையும் பக்தர்கள் உற்சவ காலம் தவிர்த்து மற்ற நாட்களில் மூலவர் முன்னர் தரிசிக்கலாம்.

ஸ்ரீ ரங்கநாதர் சன்னதியின் விமானம் தங்க முலாம் பூசப்பட்டு காட்சியளிக்கிறது. இது தமிழில் உள்ள ஓம் என்ற வார்த்தையின் வடிவத்தில் உள்ளது. இதுதவிர ஸ்ரீரங்கம் திருக்கோவில் வளாகத்திற்குள் உள்ள 81 சன்னதிகள் அல்லது கோவில்களில் காட்சிதரும் தெய்வங்களின் தரிசனத்தையும் பக்தர்கள் பெறலாம். இவற்றுள் ரங்கநாயகி தயார் சன்னதி, சுதர்சன ஆழ்வார் சன்னதி, ராமர் சன்னதி, கருடன் சன்னதி, ஆஞ்சநேயர் சன்னதி, பூமா தேவி, ஹயக்ரீவர் சன்னதி, நரசிம்மர் சன்னதி, ராமானுஜர் சன்னதி, கோபாலகிருஷ்ணர் சன்னதி ஆகியவைகள் அடங்கும்.

கருடனுக்கு மிகப்பெரிய மண்டபம் (Srirangam Ranganathar Temple Garuda Mandapam):

ஸ்ரீரங்கம் ரங்கநாதரின் கோவில் வளாகத்தில் கருடனுக்கு என மிகப்பெரிய மண்டபம் உள்ளது. இந்த மண்டபம் இருநூறு அழகான செதுக்கப்பட்ட தூண்களைக் கொண்டுள்ள கலைநுட்பங்கள் நிறைந்த மண்டபமாகும். இந்த மண்டபத்தின் மையத்தில் மிகப்பெரிய அளவில் கருட பகவான் அமர்ந்த கோலத்தில் தனது இரு கரங்களையும் கோப்பியை நிலையில் காட்சித்தருகிறார்.

பழமையான கல்வெட்டுகள் மற்றும் அழகான ஓவியங்கள்:

ஸ்ரீ ரங்கநாதசுவாமி கோவிலில் 800 க்கும் மேற்பட்ட கல்வெட்டுகள் உள்ளன. அவற்றில் 640 கோவில் சுவர்கள் மற்றும் நினைவுச்சின்னங்களில் உள்ளன. இந்த கல்வெட்டுகள் இடைக்காலத்தில் ஏற்பட்ட பல்வேறு மதம் மற்றும் சமூக தாக்கங்கள் பற்றிய நுண்ணறிவுகளை வழங்குகின்றன. இந்த கல்வெட்டுகள் சோழர், பாண்டிய, ஹொய்சாலா மற்றும் விஜயநகர இந்திய வம்சங்களைச் சேர்ந்தவை என்று தொல்பொருள் சான்றுகள் கூறுகின்றன.

கோவில் வளாகத்தின் சுவர்கள் மூலிகை மற்றும் காய்கறி வண்ணங்களைப் பயன்படுத்தி அழகான ஓவியங்களால் அலங்கரிக்கப்பட்டுள்ளன. அந்த காலத்தில் நடைமுறையில் இருந்த கலாச்சாரம் மற்றும் பாரம்பரியம் பற்றிய நுண்ணறிவுகளை அவை வழங்குகின்றன. இந்த ஓவியங்களில் பயன்படுத்தப்படும் உயர்நிலை நுட்பங்கள் அதன் நீண்ட ஆயுளுக்கு உத்தரவாதம் அளித்துள்ளன, இன்று அவற்றை மீண்டும் உருவாக்குவது என்பது மிகப்பெரிய சவாலாக உள்ளது.

வருடத்தில் 322 நாட்கள் திருவிழாக்கள் நடைபெறும் கோவில் (Srirangam Ranganathar Temple Festivals):

ஆண்டு முழுவதும், ஸ்ரீரங்கம் கோவிலில் பல திருவிழாக்கள் நடைபெறும். வருடத்தின் 365 நாட்களில் 322 நாட்களும் ஸ்ரீரங்கம் கோவில் திருவிழாக்களால் களைகட்டும் என்பது இத்தலத்தின் தனிச்சிறப்பு ஆகும். இந்த கோவிலின் 21 நாள் வருடாந்திர உற்சவம் தென்னிந்தியாவில் கட்டாயம் பார்க்க வேண்டிய திருவிழாக்களில் ஒன்றாகும் மற்றும் ஒவ்வொரு ஆண்டும் 1 மில்லியனுக்கும் அதிகமான சுற்றுலாப் பயணிகளை இது ஈர்க்கிறது என்பது குறிப்பிடத்தக்கது.

ஸ்ரீரங்கம் ரங்கநாதசுவாமி திருக்கோவிலில் வருடந்தோறும் பல்வேறு உற்சவங்கள் மற்றும் விழாக்கள் நடைபெற்று வந்தாலும், இங்கு ஆனி மாதம் நடைபெறும் ஜேஷ்டாபிஷேகம், பவித்ரோத்சவம், ஆவணி மாதம் ஸ்ரீ ஜெயந்தி உற்சவம், ஐப்பசி மாதம் நடைபெறும் டோலோத்ஸவம் எனப்படும் ஊஞ்சல் உற்சவம் மற்றும் மார்கழி மாதம் வைகுண்ட ஏகாதசியை ஒட்டி நடைபெறும் பகல் பத்து மற்றும் இராப்பத்து உற்சவம் ஆகியவை மிகவும் பிரசித்தி பெற்றது. இங்கு விழாக்காலங்களில் கடைபிடிக்கப்படும் சம்பிரதாயங்கள், பாரம்பரிய பூஜை முறைகள் மற்றும் அரையர் சேவை ஆகியவற்றை பக்தர்கள் தங்கள் வாழ்நாளில் ஒருமுறையாவது தரிசிக்க வேண்டும்.